AEBek eta Israelek Iranen aurka egindako eraso inperialistak gerra suntsitzailea piztu du Ekialde Hurbilean. Gutxienez 600 pertsona hil dira jada Iranen eraso bortitz horren ondorioz, nesken eskola bateko 165 ikasle barne, eta milaka pertsona errugabe gehiagoren heriotza eragin dezakeen hondamendia hedatzearekin egin dute mehatxu.
Israelen bonbardaketak azpiegitura zibil ugari suntsitzen ari dira eta Libanoko herritarrak ere kolpatu dituzte. Trump eta Netanyahu, Palestinako herriaren aurkako holokaustoa gauzatu ostean, Ekialde Hurbileko mapa goitik behera aldatzen ari dira bonbak erabiliz. Baina joan den urtarrilaren 3an Venezuelan egin zuten esku-hartzearekin gertatu zen bezala, hau ez dute Irango herriari askatasuna eramateko egiten. Gerra erreakzionario berri honek beste herrialde subirano baten petrolioa eskuratu nahi du, merkataritza ibilbideak kontrolatu eta Txinari kolpe gogorra eman munduaren nagusitasunerako lehian.
Ikasle Sindikatutik irmoki gaitzesten dugu gerra-kriminal hutsak diren bi ultraeskuindar hauek egindako erasoa. Iranen aurkako esku-hartzeak ez du zerikusirik demokraziaren eta emakumeen eskubideen defentsarekin. Netanyahuri eta Trumpi bost axola zaie Irango herria. Palestinar, libanoar, siriar herrien odolez blai dituzte eskuak. Afganistan eta Irak suntsitu zituzten. Mundu osoan diktadura militarrak eta erregimen despotikoak babestu dituzte. Bilatzen duten gauza bakarra abantaila geoestrategiko bat izatea da, baita beren armagintza, petrolio eta finantza enpresa handi eta monopolioen poltsikoak betetzea ere.
Hori lortzeko ehunka mila hil, milioika pobretu eta murrizketa sozial gehiagoren kontura berrarmatze basatia inposatu behar bada, haientzat ez da hainbesterako. Mendebaldeko kapital handiaren emaitza-kontuak haztea eta mundua kontrolpean izatea da funtsezkoena.
Erasoa Iranek arma nuklearrik ez eskuratzeko operazio gisa mozorrotu nahi dute. Hara nork eta Israelek, hainbat bonba atomikoren pareko suntsipen-indarrarekin Gaza suntsitu duenak, eta AEBek, basakeria inperialistaren txapelduna denak, biztanleria zibilaren aurka armamentu atomikoa erabili duen nazio bakarrak.
AEBen eta nazisionisten eraso inperialista berri hau ikasle gazte guztiok kondenatu eta borrokatu behar dugu. Eraso kriminal honen berehalako amaiera eta inperialismoaren eskuak Irandik kanporatzea exijitzen dugu. Ezkerretik eraso honi babesa ematen dioten guztiek, Teherango erregimenaren izaera integrista aldarrikatuz, zonaldeko eta mundu osoko plan inperialistei laguntzen diete.
Mulah-en erregimen totalitario eta teokratikoa benetako amesgaiztoa izaten ari da hamarkada luzez Irango herriarentzat, errepresio basatia eta milaka hildako jasan baititu. Horregatik diogu honekin amaitzeko, bere makineria polizial eta militarra suntsitzeko eta zapalkuntzarik gabeko gizarte bat eraikitzeko zeregina irandar masen zeregina dela. Urte hauetan beren kateetatik askatzeko ausardia eta konpromezu eredu bikaina izan dira. Gure elkartasun osoa altxamendu eredugarri hauekin.
Baina Irango kapitalisten eta Estatu-aparatu totalitarioaren aurkako herriaren borroka ezin dute gidatu Sha-ren moduko indar kontrairaultzaileek, hau Washington eta Tel Aviveko bere nagusi inperialisten txotxongiloa baita. Langile klaseak eta gazteek gidatu behar dute, ez borrero batzuk beste batzuengatik ordezkatzeko, baizik eta kapitalismoa eta zapalkuntza integristarekin amaitzeko. Ekialde Erdiko langile eta herri zapalduekin aliantzan, langile demokrazia sozialistari bidea irekitzeko.
Esku-hartze inperialisten eta militarismoaren gorakada, Alemanian nazien diktadura ezarri ondoren 30eko hamarkadan bizi izandakoa gero eta gehiago gogorarazten duena, langileriaren eta gazteen nazioarteko mobilizazio iraultzailearekin soilik garaitu ahal izango dugu.
Ikasle Sindikatutik eraso militarista honen aurkako mugimendu internazionalista indartsu bat altxatzeko deia egiten dugu.
Arrazoi horiengatik, Ikasle Sindikatutik Trump eta Netanyahuren eraso militarista honen aurka mugimendu internazionalista indartsu bat altxatzeko deia egiten dugu. GERRA INPERIALISTARI EZ! HAIEN PETROLIOA, GURE HILDAKOAK!
Gazteria eta ikasle mugimendu osoari dei egiten diogu ikasketa zentro guztietan asanbladak antolatzeko, ostiral honetako (martxoak 6) greba feminista gerraren aurkako oihuz betetzeko eta egin beharreko hurrengo ekintzen inguruan eztabaidatzeko. Ekintza hauen artean, argi ikusten dugu ikasle greba orokorra deitzeko aukera, Trumpek eta Netanyahuk euren eraso inperialistarekin jarraitzen badute.
Euro bat ere ez, soldadu bat ere ez, bala bat ere ez gerra inperialistarako!
Parte hartu aktiboki M6 ko greba feministan eta gerra atzerakoi honen aurkako mobilizazio guztietan
